Pasi Kuvendi i Maqedonisë votoi konkluzionet për propozimin francez, Qeveria në seancën e sotme pasdite miratoi propozimin e presidencës franceze.
“Ne morëm një vendim për të miratuar propozimin e presidencës franceze nga 30 qershori. Me këtë vendim fillojmë procesin e negociatave për anëtarësim të Maqedonisë së Veriut me BE-në. Me këtë seancë të qeverisë përfundojmë një tjetër hap objektivisht historik për vendin tonë”, tha kryeministri Dimitar Kovaçevski, i cili vendimin e bëri të ditur në një konferencë për media me anëtarët tjerë të Qeverisë.
Ai bëri të ditur se konferenca e parë ndërqeveritare do të mbahet të martën më 19 korrik në Bruksel.
“Sot kam nderin të shpall datën e konferencës së parë ndërqeveritare që do të mbahet më 19 korrik në Bruksel. Pastaj, Evropa do të jetë në Shkup, dhe Republika e Maqedonisë së Veriut në Bruksel me kapacitet të plotë, qasje në fonde, njohuri, parime të vërteta dhe më e rëndësishmja, vlerat për të cilat ne përpiqemi dhe dëshirojmë dhe e gjithë kjo bazuar në kombin dhe shtetin tonë, historinë dhe identitetin që do të shihet në të gjitha qendrat evropiane”, tha kryeministri duke bërë thirrje për unitet.
Lidhur me protokollin që vendi duhet të nënshkruajë me Sofjen zyrtare, kryeministri bëri të ditur se shefi i diplomacisë Bujar Osmani do ta informojë Republikën e Bullgarisë, ndërsa gjatë ditës do ta informojë publikun më në detaje për të gjithë procesin.
Kovaçevski: Konferenca e parë ndërqeveritare do të mbahet më 19 korrik shkruan Telegrafi.