Ministria e Bujqësisë, Pylltarisë dhe Ekonomisë së Ujërave e informon opinionin se në tremujorin e katërt të këtij viti do të shpallet Thirrja Publike 02/2025 për shfrytëzimin e fondeve nga Programi IPARD 2021–2027, masa 3 – “Investime në mjete themelore për përpunimin dhe marketingun e produkteve bujqësore dhe të peshkut.”
Nga Ministria e Bujqësisë, thonë se kjo masë përfaqëson një mundësi të jashtëzakonshme për sipërmarrësit në industrinë ushqimore që të përmirësojnë kapacitetet e tyre dhe të bëhen më konkurrues në tregun vendor dhe ndërkombëtar.
“Masa 3 – “Investime në mjete themelore për përpunimin dhe marketingun e produkteve bujqësore dhe të peshkut” nga Programi IPARD mundëson mbështetje financiare për modernizimin e kapaciteteve përpunuese, investime në përpunimin dhe marketingun e produkteve bujqësore dhe të peshkut, si dhe përafrim me standardet evropiane. Përmes kësaj mase mbështetet rritja e konkurrueshmërisë së prodhimit bujqësor dhe e sektorit agro-ushqimor në tërësi”.
“Mjetet për këtë masë sigurohen përmes Instrumentit për Ndihmë para Anëtarësimit për zhvillim rural të Bashkimit Evropian (Programi IPARD për periudhën 2021–2027). Ministria u bën thirrje të gjithë të interesuarve të fillojnë me përgatitjen në kohë të dokumentacionit të nevojshëm dhe të ndjekin njoftimet zyrtare të Agjencisë për Mbështetje Financiare në Bujqësi dhe Zhvillim Rural”, thonë nga Ministria e Bujqësisë.