Regjistri i Automjeteve të Organeve Shtetërore, Organeve të Vetëqeverisjes Lokale, Ndërmarrjeve Publike ose Personave të tjerë juridikë që disponojnë me kapital shtetëror i Komisionit Shtetëror për Parandalimin e Korrupsionit, brenda afatit të përcaktuar nga aktivitetet zgjedhore për zgjedhjet lokale të 19 tetorit, regjistroi 1.916 automjete të raportuara nga institucione të shumta, megjithëse institucionet shtetërore disponojnë rreth 6.500 automjete.
Organet shtetërore, organet e vetëqeverisjes lokale, ndërmarrjet publike ose personat e tjerë juridikë që kanë kapital shtetëror ishin të detyruar të dorëzonin të dhëna mbi numrin, markën e automjetit, vitin e prodhimit, numrin e regjistrimit dhe gjendjen e drejtimit në KSHPK jo më vonë se 18 gusht, përcjell “Sloboden Peçat”.
Nëse personat juridikë nuk dorëzojnë të dhëna mbi numrin, llojin, targën e regjistrimit dhe gjendjen e drejtimit të automjeteve që kanë në dispozicion brenda afatit të përcaktuar, KSHPK fillon një procedurë kundërvajtjeje brenda 15 ditëve nga skadimi i afatit për dorëzimin e të dhënave.
Regjistrimi i automjeteve të institucioneve kryhet me qëllim që të parandalohet përdorimi i tyre nga zyrtarët dhe personat e tjerë të emëruar dhe të zgjedhur për nevojat e fushatave zgjedhore.
Qeveria, nga ana tjetër, ka vendosur që të gjitha automjetet zyrtare do të marrin targa me ngjyrë të veçantë, të kuqe, jo më vonë se 15 shtatori 2025, me qëllim rritjen e transparencës dhe parandalimin e abuzimit. Gjithashtu është planifikuar të futet një regjistër i veçantë i makinave shtetërore, i cili do të lejojë regjistrime të sakta të vendndodhjes dhe përdorimit të çdo automjeti zyrtar./Telegrafi/
The post Nga 6.500 automjete zyrtare shtetërore në RMV, vetëm 1.916 janë paraqitur në KSHPK appeared first on Telegrafi.
