OBRM-PDUKM ka akuzuar kreun e Aleancës për Shqiptarët, Arben Taravarin për mungesë konsistence dhe standarde të dyfishta politike.
Reagimi vjen pasi ASH hodhi akuza ndaj partnerëve aktualë qeveritarë të koalicionit VLEN, se po zbatojnë politika anti-shqiptare.
“Sot, OBRM-PDUKM është ‘e keqja’, ndërsa vetëm dy muaj më parë, Taravari ulej krenar në Qeveri me të njëjtën OBRM-PDUKM. Me çfarë është i shantazhuar Taravari dhe sa herë do ta shesë të njëjtën histori?”, thonë nga partia në pushtet.
Ata e akuzojnë Taravarin për hipokrizi dhe për ndryshim të qëllimshëm të retorikës, në varësi të funksioneve që merr ose jo në qeveri.
“Taravari ose nuk di çfarë flet, ose e di shumë mirë, por ndryshon pllakën për të justifikuar hyrjet dhe daljet e tij nga koalicionet. Në shkurt 2024, Taravari deklaroi publikisht se si OBRM-PDUKM ashtu edhe LSDM e konsideronin bllokun e tij si partner të dëshiruar. Ai pranoi se kishte marrë oferta nga Ali Ahmeti për pozita të rëndësishme, përfshirë atë të kryeministrit të parë shqiptar dhe kandidatit për president. Në qershor 2024, Qeveria u votua me përfshirjen e OBRM-PDUKM-së dhe koalicionit opozitar shqiptar VLEN. Në maj 2025, ASH e Taravarit u largua nga VLEN, duke akuzuar për premtime të pambajtura – megjithatë, një pjesë e partisë së tij mbeti në Qeveri. Nga kjo, OBRM-PDUKM konkludon se veprimet e Taravarit nuk lidhen me parime apo ideologji, por ndoshta me interesa personale apo ndikime të tjera”, thuhet në reagim.
The post OBRM-PDUKM: Sipas Taravarit sot jemi e keqja e vendit, teksa deri para dy muajve ulej krenar në Qeveri krah nesh appeared first on Telegrafi.