Prokuroria Themelore Publike në Kavadar lëshoi Urdhër për të zhvilluar procedurë hetimore kundër tre personave për të cilët ekziston dyshim i bazuar se kanë kryer vepër penale si bashkëpunëtorë – “Lëndim i rëndë trupor me pasoja fatale”.
Të dyshuarit, dy prej të cilëve janë 27 vjeç dhe njëri është 35 vjeç, më 27 gusht rreth orës 5 të mëngjesit, kanë pasur një grindje verbale me të dëmtuarin në një kazino në Kavadar.
“Pastaj ata kanë dalë jashtë, e kanë sulmuar fizikisht dhe e kanë goditur me grushte dhe shqelma në të gjithë trupin dhe kokën. I dëmtuari është përpjekur të hyjë në kazino, por ka humbur ndjenjat. Goditjet i kanë shkaktuar lëndime të shumta të rënda trupore nga të cilat ai ka vdekur”.
“Gjatë procedurës hetimore, do të sigurohen të gjitha provat dhe do të kryhet ekzaminim psikiatrik i të dyshuarve, dhe nëse përcaktohet se ata kanë pasur vetëdije dhe qëllim për ta privuar të dëmtuarin nga jeta, vepra penale mund të rikualifikohet si vrasje”.
“Prokurori publik i paraqiti edhe propozim gjyqtarit të procedurës paraprake të Gjykatës Themelore në Kavadar për caktimin e masës së paraburgimit për tre të dyshuarit, veçanërisht duke pasur parasysh rrezikun e arratisjes. Kjo tregohet edhe nga sjellja e tyre menjëherë pas ngjarjes, pasi ata u larguan nga vendi i ngjarjes dhe nuk u paraqitën vetë në polici. Në vend të kësaj, ata shkuan së bashku në banesën e njërit prej të dyshuarve. Për këto arsye, prokurori publik vlerësoi se paraburgimi është i nevojshëm për zhvillimin e qetë të procedurës dhe sigurimin e të gjitha provave”, thonë nga Prokuroria.
The post Paraburgim për të dyshuarit për vrasjen në Kavadar, Prokuroria kërkon të bëhet ekzaminim psikiatrik i tyre appeared first on Telegrafi.