Mjedisi i pastër dhe parandalimi i ndotjes së ajrit janë obligim i çdo individi, por edhe i çdo institucioni. Edhe pse Ministria e Vetëqeverisjes Lokale nuk ka ingerenca të drejtpërdrejta në fushën e ndotjes së ajrit, ajo është ende e përfshirë në mënyrë aktive në aktivitete konkrete aty ku është e mundur. Këtë e deklaroi numri një i pushtetit lokal, Zllatko Perinski në debatin e sotëm mbikëqyrës në Kuvend me temën “Efektet e ndotjes së ajrit në Shkup dhe qytete të tjera mbi shëndetin e njeriut dhe masat që ndërmerren për mbrojtjen e shëndetit publik”.
“Mbrojtja e mjedisit jetësor dhe natyrës, si dhe ndërmarrja e masave për parandalimin e ndotjes së ajrit përcaktohen si kompetenca të komunave konform Ligjit për vetëqeverisje lokale. Kjo do të thotë që lufta për ajër të pastër është një obligim dhe përgjegjësi e përbashkët e të gjitha niveleve të qeverisjes”, ka thënë ai.
Perinski i është referuar edhe Planit aksionar për zbatimin e programit të zhvillimit të qëndrueshëm lokal dhe decentralizimit për periudhën 2024-2026 i cili parasheh masa konkrete në përballjen me ndotjen e ajrit.
“Në këtë drejtim, Plani aksionar për zbatimin e programit për zhvillim të qëndrueshëm lokal dhe decentralizim për periudhën 2024-2026 parashikon masa konkrete për përballje me ndotjen e ajrit, duke njohur seriozitetin dhe ndikimin e saj në cilësinë e jetës. Masat e parapara përfshijnë përmirësimin e kushteve të trafikut për automjetet që nuk shkaktojnë ndotje të ajrit, forcim të bashkëpunimit midis shtetit dhe komunave, aktivitete institucionale si monitorim i avancuar, mbikëqyrje e shtuar inspektuese dhe përgatitje të planeve lokale për cilësinë e ajrit. Zbatimi i këtyre masave kërkon angazhim të koordinuar nga më shumë institucione, me çka tema merr një përparësi të merituar në politikat kombëtare zhvillimore”, thekson ministri.
Perinski mes tjerash ka thënë se Ministria për Vetëqeverisje Lokale gjithashtu merr pjesë indirekt edhe në financimin e aktiviteteve në sferën e mjedisit jetësor. Ai theksoi se është e nevojshme të propozohen masa dhe zgjidhje që do të ngrisin ose parandalojnë problemin e ndotjes së ajrit.
The post Perinski: Ministria e Vetëqeverisjes Lokale është e përfshirë në mënyrë aktive në zgjidhjen e problemit me ndotjen e ajrit appeared first on Telegrafi.