Dy grabitje banesash kanë ndodhur në harkun kohor të dy ditëve në Mat.
Grabitja e parë ka ndodhur dy netë më parë në fshatin Gërman. Mësohet se persona të paidentifikuar kanë hyrë në banesën e shtetasit Sh.B duke i marrë një sasi parash që mendohet të jenë në vlerën e 200 mijë lekëve të rinj.
Nga deklarimet e bëra nga ana e pronarit të banesës, shumën e grabitur ai e kishte siguruar nga shitja e 2 viçave në qytetin e Burrelit. Ai dyshon se grabitësit kanë patur dijeni për këtë dhe mund ta kenë ndjekur e më pas kanë hyrë në banesën e tij teksa ai ndodhej jashtë. Shtetasi Sh.B ka njoftuar policinë e cila sipas tij ka shkuar me vonesë.
Grabitja e dytë mësohet se ka ndodhur në qytetin e Burrelit në lagjen “Drita”. Persona të maskuar dyshohet se kanë hyrë në një banesë në të cilën jetonte e vetme një e moshuar.
Nuk dihet se çfarë kanë arritur të marrin grabitësit, ndërsa policia ka mbërritur pranë banesës mëngjesin e të shtunës.
Të dyja këto ngjarje nuk janë raportuar nga policia, ndërsa banorët e rrethit Mat po ndjehen të pasigurtë. Pak më shumë se një muaj më parë një grabitje e rëndë ndodhi në fshatin Dom. Persona të maskuar dhe të armatosur hynë në një banesë dhe pasi dhunuan kryefamiljarin arritën të merrnin një shumë të konsiderueshme parash.