Rreth tre mijë mjekë shqiptarë që jetojnë dhe veprojnë në Europë janë bashkuar në kërkesën e tyre kundrejt Komisionit Europian që të mundësohet sa më parë imunizimi i popullsisë në Shqipëri, Kosovë, Mal të Zi dhe Maqedoninë e Veriut.
Federata e Mjekëve Shqiptarë në Europë nënvizon se numri aktual i vaksinave që arrijnë në Shqipëri është shumë i ulët, për të sjellë një rezultat pozitiv në luftën kundër Covid 19.
“Çështja e sigurimit të vaksinave është bërë një problem politik që nuk adreson situatën në vendet fqinje të europës, që nuk janë anëtare të BE-së”, shkruajnë mjekët.
Ata kërkojnë që përfaqësuesit e BE të rishikojnë edhe njëherë pozicionin e tyre, në mënyrë që edhe vendet e Ballkanit Perëndimor të sigurojnë vaksinën.
“Federata Mjekësore Shqiptare e Evropës është e përkushtuar të ndihmojë vendet e origjinës, Ballkanit Perëndimor, për të kapërcyer këtë situatë jashtëzakonisht të vështirë. Rajoni shqiptar, për arsye të shumta, ka vështirësi në marrjen e vaksinës. Numri aktual aktual i vaksinave që arrijnë në Shqipëri është shumë i ulët dhe askund afër sa për të sjellë një rezultat pozitiv në luftën kundër Covid 19 dhe për të siguruar mbrojtjen e popullatës.”