Më 6 gusht të vitit 2016, komuna e Gazi Babës u përfshi nga një përmbytje e madhe që mori 22 jetë njerëzish dhe shkaktoi dëme të mëdha materiale.
Kryetari i Komunës së Gazi Babës, Boban Stefkovski, me rastin e gjashtë vjetorit të vërshimeve, përmes një postimi në Facebook ka thënë se viktimat nuk duhet të harrohen dhe ka falënderuar të gjithë ata që kanë ndihmuar në tejkalimin e pasojave të fatkeqësisë natyrore.
“Kanë kaluar gjashtë vite nga vërshimi katastrofik që përfshiu komunën e Gazi Babës. Njëzet e dy bashkëqytetarë tanë humbën jetën dhe kujtimi për ta do të zgjasë përjetë. Dëmet materiale ishin të mëdha. Shtëpitë e banorëve të Stajkovcit, Singeliqit dhe vendbanimeve përreth u shkatërruan plotësisht. Sasia e madhe e ujit lau gjithçka në një çast. Kur në dukje gjithçka u shkatërrua, lindi një shpresë e re. Shumë komuna dhe qytete nga Maqedonia, shumë vende nga bota kanë treguar solidaritetin dhe humanizmin e tyre ndaj komunës sonë. Si kryetar bashkie, shpreh mirënjohjen time për të gjithë ata që kontribuan në çfarëdo mënyre për përballimin e pasojave të përmbytjeve. Asnjëherë nuk duhet të harrohen viktimat e vërshimeve, si dhe solidariteti dhe humanizmi i mijëra njerëzve që ndihmuan në përballimin e pasojave të vërshimeve”, shkruan Stefkovski.
The post Gjashtë vite nga përmbytjet në Gazi Babë, ku humbën jetën 22 persona appeared first on Telegrafi.
