Ditët e panairit të librit shpesh nxjerrin në pah problematika që hasen nga lexuesit apo dhe nga botuesit. Një prej tyre është botimi i librave për fëmijë, peripecitë që kalon shkrimtari që në momentin që nis të shkruaj e derisa libri sheh dritën e botimit. Regjistër i zgjedhur për të vegjlit, leksik i kujdesshëm e mbi të gjitha mesazhi që vepra do të përcjellë janë sfidat e shkrimtarëve për fëmijë sot.
Për autorët shkrimi i një libri për fëmijë shpesh është më i vështirë sesa të shkruash për të rriturit. E aq më tepër kur letërsia shqipe vihet përballë autorëve të huaj.
Letërsia e të vegjëlve kritikohet shpesh nga prindërit, të cilëve u duhet të përzgjedhin mes titujve, veprat më të përshtatshme për fëmijët e tyre.
Shkrimtarët kërkojnë që letërsia shqipe të jetë zgjedhja e parë, por pa anashkaluar letërsinë e përkthyer, kryesisht nga emrat e njohur ndërsa apelojnë çdo ditë e më shumë për afrimin e fëmijëve me librin, si një hallkë e rëndësishme e formimit të tyre./vizionplus.tv
