Themeluesi i WikiLeaks, Julian Assange, ka marrë lejen për t’u martuar me partneren e tij Stella Moris në burgun Belmarsh në Londër, ku ai mbahej që nga viti 2019 pasi Shtetet e Bashkuara ndërmorën veprime ligjore për ekstradimin e tij.
Lajmi raportohet nga The Guardian, sipas të cilit, çifti, i cili u njoh kur Assange jetonte në ambasadën e Ekuadorit në Londër, ka dy fëmijë, por leja e kërkuar prej disa kohësh nuk është dhënë deri më tani. Për këtë, çifti ishte gati të merrte masa ligjore kundër drejtorit të burgut dhe sekretarit të drejtësisë, Dominic Raab, duke i akuzuar ata se donin të pengonin martesën.
Sipas Ministrisë së Mbrojtjes, ceremonitë martesore që përfshijnë të burgosurit duhet të zhvillohen në burg, me përjashtim të të burgosurve të kategorisë D.
Assange, një shtetas australian, u arrestua nga policia pasi kaloi pesë vjet në ambasadën e Ekuadorit, ku kishte kërkuar azil politik ndërsa luftonte për të shmangur ekstradimin në Suedi, nga frika se do të çohej në SHBA për t’u marrë në pyetje mbi aktivitetet e Wikileaks.
Ai u burgos për 12 muaj për anashkalimin e lirimit me kusht, por u mbajt në Belmarsh, ndërsa një çështje e gjatë ligjore u ngrit nga SHBA-ja.
Në janar, një gjykatës refuzoi kërkesën e SHBA-së për të ekstraduar Assange, por u depozitua një apel, me rezultatin ende në pritje. Asnjë datë nuk është caktuar për dasmën.
