Nëse dikush guxon të ndajë Tajvanin nga Kina, ushtria kineze nuk ka zgjidhje tjetër veçse të luftojë, kjo ishte deklarata që ministri kinez i mbrojtjes bëri në samitin e Singaporit, në prani të sekretarit amerikan te Mbrojtjes, Lloyd Austin.
Retorika kërcënuese e Kinës vjen në kohën kur 3 javë më parë, presidenti amerikan Joe Biden gjatë një vizite në Japoni tha se Uashingtoni do të mbronte ushtarakisht Tajvanin nëse sulmohej nga Kina.
Pekini zyrtar duket se është ndjerë i provokuar edhe nga Pentagoni, i cili të mërkurën miratoi një shitje armësh prej 120 milionë dollarësh për Taipein.
Ndërkohë ministria e jashtme e Tajvanit pohoi se pretendimet e Kinës ishin absurde dhe se Tajvani nuk ka qenë kurrë nën juridiksionin e qeverisë kineze.
Departamenti amerikan i mbrojtjes në një deklaratë tha se Austin i bëri thirrje Kinës që të përmbahet nga veprimet e mëtejshme destabilizuese në Tajvan, ndërsa ripohoi rëndësinë e paqes dhe stabilitetit në këtë rajon.
