Merkel dhe Putin diskutojnë për tensionet në Ukrainë

Pinterest LinkedIn Tumblr +
Merkel dhe Putin diskutojnë për tensionet në Ukrainë

Kancelarja gjermane, Angela Merkel dhe presidenti i Rusisë, Vladimir Putin, gjatë një bisede telefonike kanë diskutuar për rritjen e tensioneve në Ukrainën lindore dhe për rastin e burgosjes së liderit të opozitës ruse, Alexei Navalny.

Në javët e fundit janë shtuar përplasjet midis separatistëve pro-Rusisë dhe forcave ukrainase. Frikën për një përshkallëzim të mundshëm të konfliktit e ka rritur edhe një ndërtim ushtarak rus në kufi me Ukrainën.

“Presidenti i Rusisë dhe kancelarja e Gjermanisë shprehën shqetësim rreth përshkallëzimit të tensioneve në juglindje të Ukrainës. Putin foli për veprimet provokuese të Kievit, i cili kohët e fundit e ka përkeqësuar me qëllim situatën në vijën e frontit”, tha Kremlini në një deklaratë.

Më herët të enjten, presidenti ukrainas, Volodymyr Zelensky, udhëtoi për në lindje të vendit. Ai u ka bërë thirrje aleatëve perëndimorë për mbështetje.

Advertisement

Konflikti shpërtheu më 2014, pasi Moska aneksoi gadishullin e Krimesë. Nga konflikti janë vrarë më shumë se 13.000 persona.

Kievi dhe Perëndimi kanë akuzuar Rusinë për mbështetjen e separatistëve me armatim dhe trupa.

Moska vazhdimisht i ka mohuar ato pretendime.

Që nga viti 2015, Franca dhe Gjermania kanë ndërmjetësuar bisedimet e paqes, por ato nuk kanë arritur t’i japin fund luftimeve.

Advertisement

Kremlini nuk ka mohuar lëvizjet e fundit të trupave në kufi me Ukrainën, por ka këmbëngulur se Moska nuk paraqet asnjë kërcënim.

Të dy udhëheqësit, Putin dhe Merkel, diskutuan gjithashtu edhe për konfliktin në Siri dhe krizën politike në Libi./ REL

Share.

Comments are closed.

Copyright © 2023 Struga.info | Privacy policy