Rrjeti zviceran i supermarketeve Migros ka reaguar ndaj protestave kundër racizmit që kanë përfshirë vende të ndryshme të botës me heqjen e ëmbëlsirave “moretti” , apo “ kokë arapi” nga raftet e tij.
Pas vitesh të tëra polemikash e peticionesh, mbërrin kështu bllokimi i çokollateve të prodhuara në 1946-tën nga kompania Dubler. “Vendosëm ta heqim këtë artikull nga marketet tona. Debati aktual na ka shtyrë të bëjmë një rivlerësim të situatës.
E kemi të qartë se edhe vendimi ynë do të ngjallë diskutime”, shkruhet në faqen e Twitterit të Migros. Kjo nuk është hera e parë që “moretti” shkakton polemika. Një peticion i ndërmarrë në 2017-tën kërkonte një emër të ri për këtë ëmbëlsirë, por prodhuesit zgjodhën t`I qëndronin besnikë emrit historik të saj.
