Sistemi i mbrojtjes ajrore “Patriot” i prodhuar në Shtetet e Bashkuara të Amerikës është në rrugën e tij për në Sllovaki.
Lajmi është bërë i ditur nga ministri i Mbrojtjes, Jaroslav Nad.
Kështu Sllovakisë i hapet rruga për të ofruar pajisje të ngjashme në Ukrainë.
“Mund të konfirmoj se njësitë e para për të vendosur sistemin anti-ajror po mbërrijnë gradualisht”, tha Nad në Facebook, duke shtuar se dorëzimi do të vazhdojë gjatë ditëve të ardhshme.
Sllovakia, anëtare e NATO-s, tha këtë javë se ishte e gatshme t’i siguronte Ukrainës sistemin e saj anti-ajror S-300 të prodhuar nga Rusia me kusht që të merrte një zëvendësues për të shmangur një boshllëk sigurie.
Ajo ka rënë dakord paraprakisht t’i sigurojë Ukrainës një sistem kyç të mbrojtjes ajrore të epokës sovjetike për të ndihmuar mbrojtjen kundër sulmeve ajrore ruse. Kjo u bë e ditur nga tre burime të njohura me këtë çështje.
Sipas dy burimeve, Sllovakia, një nga tre aleatët e NATO-s që kanë sistemet e mbrojtjes në fjalë, kërkon garanci se sistemet do të zëvendësohen menjëherë.
Nëse një vend siguron S-300-at e tij, vendi furnizues ka të ngjarë të marrë sistemin raketor të mbrojtjes ajrore Patriot të prodhuar nga SHBA-të për të plotësuar aftësinë që do të hiqte dorë.
Gjermania dhe Holanda tashmë kanë njoftuar publikisht se po dërgojnë Patriotët në Sllovaki.
Por integrimi i një sistemi të ri, kompleks të mbrojtjes ajrore në arkitekturën ekzistuese ushtarake të një vendi, si dhe trajnimi i forcave të tij për ta përdorur atë, mund të marrë kohë – paralajmëroi një burim i njohur me këtë çështje.
