Ish-kryeministri i Sudanit, Abdalla Hamdok, ka paralajmëruar se konflikti në vendin e tij mund të bëhet më i ashpër se ai në Siri dhe Libi. Luftimet midis ushtrisë së rregullt dhe Forcave të Mbështetjes së Shpejtë paraushtarake do të ishin një “makth” për botën nëse do të vazhdonin, theksoi ai.
Këtë të diel zhurmat e avionëve luftarakë dhe kundërajrorëve janë dëgjuar mbi kryeqytetin Khartoum. Ushtria ka sulmuar nga të gjitha drejtimet, duke përdorur artileri të rëndë. Luftimet që nisën më 15 prill kanë lënë qindra të vdekur, ndërsa mijëra njerëz po largohen nga vendi.
Numri i viktimave të civilëve u rrit të shtunën në 411. Në disa zona brenda dhe përreth kryeqytetit, banorët kanë raportuar se dyqanet janë rihapur dhe normaliteti është kthyer gradualisht, ndërsa shkalla e luftimeve është zvogëluar pas armëpushimit. Por në zona të tjera civilet janë ende të tmerruar nga shpërthimet. Në javën e tretë, luftimet kanë shkaktuar 2,023 të plagosur në radhët e civilëve sipas sindikatës së mjekëve.
Ndërkohë, në portet e Sudanit ka skena kaotike ku njerëzit janë të dëshpëruar për të hipur në anije, disa prej të cilave janë nisur drejt Arabisë Saudite dhe Jemenit.
Qeveria e Mbretërisë së Bashkuar ka bërë të ditur se kishte përfunduar operacionin e saj të evakuimit.
