Pas bombardimeve ruse në Kiev, presidenti i Ukrainës, Volodymyr Zelensky iu bëri thirrje qytetarëve të mos frikësohen, ndërsa u zotua për fitore.
Në një videomesazh të postuar në Facebook, kreu i shtetit ukrainas prezantoi ligjin ushtarak në të gjithë vendin,, duke shtuar se kishte folur me telefon me presidentin amerikan, Joe Biden.
“Ky është një pushtim krejtësisht i pabazë dhe cinik. Ne, qytetarët e Ukrainës, kemi vendosur të ardhmen tonë që nga viti 1991”, tha ai duke iu referuar vitit të rënies së Bashkimit Sovjetik.
“Ne jemi duke punuar. Ushtria po punon. Mos u frikësoni. Ne jemi të fortë. Jemi gati për gjithçka. Ne do t’i mposhtim të gjithë. Sepse ne jemi Ukraina.”
Një ditë më parë, Zelensky hodhi poshtë pretendimet e Moskës se vendi i tij përbënte një kërcënim për Rusinë dhe bëri një lutje të minutës së fundit për paqe.
“Populli i Ukrainës dhe qeveria e Ukrainës duan paqen”, tha Zelensky në një fjalim emocional të mërkurën, duke iu drejtuar në gjuhën ruse qytetarëve rusë.
