Rusia është gati të pushtojë Ukrainën. Paralajmërimin e bëri ministri i Jashtëm ukrainas, Dmytro Kuleba, gjatë një takimi me Sekretarin e Përgjithshëm të NATO-s, Jens Stoltenberg.
“Rusia ka rreshtuar armatën e saj pranë kufirit tonë që në mars dhe nuk e ka tërhequr më prej aty. Ajo që po shohim tani është një situatë e rënduar, ku Rusia po tregon se mund të aktivizojë me shpejtësi trupat e mbledhura dhe se çdo alternativë, përfshi edhe atë ushtarake, është marrë në konsideratë nga lidershipi rus”, tha Kubela në një konferencë të përbashkët për mediat me Stoltenberg.
Nga ana e tij, shefi i aleancës ushtarake të Atlantikut verior tha se përqendrimi i trupave ruse në kufirin me Ukrainën ngjason me atë që ndodhi para pushtimit të Krimesë. “NATO mbetet vigjilente, po e monitorojmë nga afër situatën dhe vijojmë të konsultohemi me partnerët, si Ukraina dhe Bashkimi Europian. Çdo veprim provokues ose agresiv nga ana e Rusisë do të ishte shqetësim i madh. I bëjmë thirrje Rusisë të tregohet transparente për veprimtarinë ushtarake. Është e rëndësishme të ulim tensionet. NATO qëndron pranë Ukrainës. Nuk e pranojmë dhe nuk do ta pranojmë aneksimin e paligjshëm të Krimesë dhe i bëjmë thirrje Rusisë që t’i japë fund mbështetjes për militantët në Donbas”.
Në javët e fundit, dhjetëra mijëra trupa ruse, përfshi edhe njësitë speciale, janë pozicionuar në kufirin me Ukrainën. Kjo ka bërë që edhe Shtetet e Bashkuara të paralajmërojnë aleatët europianë që Moska po e mendon pushtimin e lindjes së Ukrainës. Rusia i ka hedhur poshtë këto pretendime dhe ka akuzuar NATO-n për provokimin e tensioneve në rajon me stërvitjet ushtarake që kryen.
Tensionet janë rritur edhe më tepër në një tjetër pikë të nxehtë, në kufirin mes Polonisë dhe Bjellorusisë, ku mijëra emigrantë nga Afganistani dhe Lindja e Mesme kanë ngecur aty, pasi nuk lejohen të futen në territorin e Bashkimit Europian. Polonia akuzon Bjellorusinë se po i përdor si armë refugjatët dhe gjithashtu thotë se është Putini orkestruesi i kësaj situate.
