Shefja e Komisionit të BE-së, Ursula von der Leyen, paralajmëroi Rusinë për “sanksione masive ekonomike dhe financiare” nëse sulmon Ukrainën.
Duke folur përmes një video lidhje në Forumin Ekonomik Botëror, Ursula von der Leyen njohu angazhimet diplomatike të javës së kaluar midis Rusisë dhe vendeve perëndimore mbi marrëveshjet evropiane të sigurisë.
Ajo theksoi se blloku dëshiron dialog me Rusinë për të zgjidhur konfliktin në Ukrainë.
“Nëse situata përkeqësohet, nëse ka ndonjë sulm të mëtejshëm mbi integritetin territorial të Ukrainës, ne do të përgjigjemi me sanksione masive ekonomike dhe financiare”, paralajmëroi von der Leyen.
Vërejtjet e saj erdhën një ditë pasi presidenti amerikan Joe Biden tha se ai besonte se Rusia do të lëvizë për të pushtuar Ukrainën.
Von der Leyen hodhi poshtë gjithashtu “përpjekjet ruse për të ndarë Evropën”, duke thënë: “Ne nuk do të kthehemi në një logjikë të vjetër të konkurrencës dhe sferave të ndikimit, ku vende të tëra trajtoheshin si prona apo oborre të pasme”.
Në takimin e Këshillit NATO-Rusi, aleanca ushtarake hodhi poshtë pretendimet e Rusisë për ndalimin e procesit të zgjerimit të NATO-s dhe tërheqjen e forcave nga krahët lindorë të NATO-s, si dhe i bëri thirrje Rusisë që t’i japë fund retorikës kërcënuese dhe grumbullimit ushtarak në dhe rreth Ukrainës.
Javën e kaluar, bisedimet midis Rusisë dhe vendeve perëndimore mbi projekt-traktatet e propozuara nga Moska mbi marrëveshjet evropiane të sigurisë përfunduan pa përparim./AA
