Nga koalicioni Aleanca për Shqiptarët – Alternativa në konferencë për shtyp bënë të ditur rrjedhën e këtij organizimi dhe masat që janë ndërmarrë dhe po ndërmerren për mbarëvajtjen e tij.
“Me këtë rast, para së gjithash, dëshiroj t’ju informoj se Marshi për demokraci më shumë se protestë është një shprehje publike e vullnetit të qytetarit shqiptar në Maqedoninë e Veriut, i cili pas zgjedhjeve të fundit konsideron se seriozisht është dëmtuar demokracia dhe mënyra e shprehjes së vullnetit të lirë të qytetarit shqiptar. Si shenjë e shprehjes së revoltës për suprimimin e të drejtës më sublime të votës së lirë, ky marsh pikërisht para selisë së Delegacionit të Bashkimit Evropian në Shkup do të japë mesazhet se një vend që po i fillon negociatat për qenë anëtar i BE-së nuk guxon të lejojë që një pjesë e qytetarëve të tij të privohen nga e drejta për të zgjedhur dhe për të qenë të zgjedhur, që është e drejta elementare njerëzore dhe politike në BE”, shprehen nga koalicioni AA, njofton Telegrafi Maqedoni.
Simbolet e këtij marshi, sipas koalicionit, do të jenë simbole kombëtare dhe të aleatëve perëndimor, ndërsa sloganet do të jenë të lidhura me mbrojtjen e demokracisë.
“Marshi do të fillojë në orën 19.00 nga Parku i Çairit në Shkup, do të kalojë nëpër rrugën Cvetan Dimov, te qendra “Mavrovasja” do të kthejë në të djathtë për të kaluar para Qeverisë së Republikës së Maqedonisë së Veriut e për të përfunduar në orën 20.00 para Zyrave të Delegacionit të Bashkimit Evropian”, shprehen nga AA.
Poashtu bëjnë të ditur se për të evituar çfarëdo mundësie për infektim, organizatorët janë kujdesur edhe për numrin e pjesëmarrësve dhe se për realizimin e këtij marshi është njoftuar edhe policia, ndërsa organizatorët kanë siguruar edhe kujdestarë të tyre për mbarëvajtjen e marshit.
“Me këtë rast u bëjmë thirrje të gjithë qytetarëve që ndjejnë se janë të privuar nga e drejta e tyre demokratike që, duke i respektuar masat e sipërpërmendura, t’i bashkohen këtij marshi që në mënyrë simbolike të bëhen pjesëmarrës në demokratizimin e shoqërisë shqiptare në Maqedoninë e Veriut”, bëjnë apel nga AA./Telegrafi/
Koalicioni AA: Marshi për demokraci synon mbrojtjen e demokracisë dhe kthimin e besimit të qytetarëve në vlerat demokratike shkruan Telegrafi.