Sot koalicioni Aleanca për Shqiptarët dhe Alternativa në Shkup, e promovoi fushatën dhe platformën “shetetesia.mk”.
Kjo platformë, në emër të koalicionit, u prezantua nga Bashkim Bakiu, drejtues i Qendrës Analitike të ASH-së.
Bakiu tha se “Shtetesia.mk” është platformë kombëtare, ku të gjithë qytetarët, pa dallim, do të kenë mundësi ta paraqesin problemin e tyre për marrjen e shtetësisë.
“Synimi i kësaj platforme është grumbullimi i informacioneve nga qytetarët të cilët ballafaqohen me problemin e marrjes së shtetësisë, tashmë 30 vite, që nga pavarësia e Maqedonisë së Veriut”, tha Bakiu.
Sipas tij, të jesh pa shtetësi do të thotë të mos jesh i njohur si qytetar nga një shtet në kornizat e ligjit të tij.
“Për shkak të kësaj anomalie ligjore, Republika e Maqedonisë Veriore parandalon që banorët në territorin e saj të kenë qasje në të drejtat themelore civile, politike, ekonomike, kulturore dhe sociale. Përkundër faktit se Republika e Maqedonisë Veriore është nënshkruese e konventave të rëndësishme përmes sistemit të të drejtave të njeriut të Këshillit të Evropës, si dhe Deklaratës Universale të Kombeve të Bashkuara për të Drejtat e Njeriut, të cilat përcaktojnë se të gjithë kanë të drejtën e shtetësisë, respektivisht asnjë personi mos t’i privohet e drejta e shtetësisë, sot në territorin e vendit ka njerëz që janë të padukshëm ligjërisht, pra njerëz pa shtetësi”, tha Bakiu.
Në fund të këtij prezantimi para gazetarëve folën edhe dy kryetarët e partive të koalicionit, Ziadin Sela dhe Afrim Gashi.
Kryetari i ASH-së Ziadin Sela, deklaroi se shtetësia është detyrim minimal shtetëror ndaj secilit qytetar të vendit dhe nuk mund të lejohet akoma që shteti me arsyetime banale t’ua mohojë qytetarëve këtë të drejtë themelore njerëzore.
Ndërsa kryetari i Alternativës, Afrim Gashi, tha shteti përfundimisht duhet të çlirohet nga droja se po rritet numri i një bashkësie etnike dhe në këtë mënyrë ta pengojë të drejtën e qytetarëve për të pasur dokument shtetësie.
Maqedoni: ASH dhe Alternativa promovojnë fushatën “shtetësia” shkruan Telegrafi.