Kryetari i Kuvendit Talat Xhaferi, me propozim-vendim do ta shkarkojë anëtarin e Komisionit për Zgjedhje dhe Emërime Fadil Zendeli, dhe me këtë planifikon ta zhbllokojë punën e Kuvendit.
Kujtojmë që opozita fitoi shumicën në Komision me Zendelin, pasi Besa u largua nga pushteti dhe iu bashkua opozitës, përcjell Telegrafi Maqedoni.
Megjithatë, ai nuk pranoi të tërhiqej dhe t’ia dorëzonte postin partnerit të ri qeveritar Alternativa, e cila sipas mazhorancës ishte e paligjshme.
Sipas deputetit të OBRM-PDUKM-së, Antonio Milloshoski, propozimi i Xhaferit për shkarkimin e Zendelit do të jetë precedent, duke qenë se për herë të parë do të ndodhte shkarkimi i një anëtari të trupit punues pa propozim-vendim të Komisionit për zgjedhje dhe emërime.
Ndryshe, puna e këtij Komisioni ndër të tjera është e rëndësishme për zgjedhjen e katër gjyqtarëve të rinj kushtetues./Telegrafi/
Xhaferi do ta shkarkojë Zendelin nga Komisioni për Zgjedhje dhe Emërime shkruan Telegrafi.