Një ditë pasi mazhoranca vendosi që e drejta e vetos së Partisë Demokratike në realizimin e reformës zgjedhore t’i përkasë Lulzim Bashës, ish- kryeministri Sali Berisha paralajmëroi reagim të ashpër të opozitës në parlament.
Gjatë një konference me gazetarët, Berisha theksoi se 50 deputetë të opozitës kishin vendosur që përfaqësuesi i tyre në komisionin e reformës elektorale të ishte Oerd Bylykbashi, dhe Partia Socialiste nuk ka asnjë të drejtë të përcaktojë se kush është përfaqësuesi i Partisë Demokratike.
SALI BERISHA
“Opozita, në ditët në vazhdim, do të shqyrtojë situatën shumë kritike të krijuar nga votimi i djeshëm në parlament dhe do të dalë me konkluzionet e saj. Ajo çka fakton dita e djeshme, fakton se Rama dhe pluralizmi janë të papajtueshëm, se Edi Rama nuk pajtohet me pluralizmin politik të vërtetë në Shqipëri.”
Në kushtet kur as bashkimi me kreun e grupit parlamentar të PD Gazment Bardhin nuk po e ndihmon liderin historik të PD të marrë logon dhe vulën e Partisë Demokratike në parlament apo në gjykatë, zërat për krijimin e një force të re politike janë shtuar, por vetë Berisha mbetet kundër kësaj ideje.
“Gjë e cila është normale si diskutim, por mendimi im është ky se para një padrejtësie, njeriu nuk tërhiqet. Ne do bëjmë një luftë deri në fund me Edi Ramën, i cili pa diskutim kërkon të mbajë peng logon tonë me Lul Pengun dhe Alibashën. Por e drejta është me ne. “
Advertisement
Por për të gjithë ata deputetë që mbështesin Gazment Bardhin e kërkojnë një Parti Demokratike pa Sali Berishën, lideri historik i PD ka një përgjigje të prerë.
“Se çfarë kërkon X apo Y, njëri apo tjetri, secili i ka rrugët e hapura për të ndjekur çdo procedurë që do.Kurse unë ndjek në mënyrë transparente ato që kam deklaruar.
Advertisement
Rikthimi i Sali Berishës është një realitet jashtëzakonisht i veçantë.”
Prej 5 shtatorit Sali Berisha e Gazment Bardhi së bashku me rreth 50 deputetë opozitarë janë takuar rregullisht për të koordinuar betejën në parlament, por deri tani as Gazment Bardhi e as 17 deputetë që ai ka me vetë nuk e njohin Berishën si kryetar të Partisë Demokratike.
