Ish-kryeministri Sali Berisha nga Lushnja iu ka bërë thirrje demokratëve të bashkohen rreth “Shtëpisë së Lirisë” si e vetmja përfaqësuese e opozitës në vend. Gjatë një takimi me të rinjtë e Partisë Demokratike, Berisha shpjegoi se beteja e demokratëve në 6 mars shtrihet në dy fronte; kundër qeverisë Rama, por edhe kundër Lulzim Bashës.
“Duhet të punojmë shumë për këtë fitore se nga njëra anë kemi qeverinë, por nga ana tjetër, Edi Rama ka rrëmbyer logon e PD dhe ia ka dhënë pengut të tij Lulzim Basha, për të keqorientuar zgjedhësit. Prandaj shpjegojuni njerëzve se vota për opozitën është te Shtëpia e Lirisë.”
Berisha iu bëri thirrje demokratëve të bashkohen e të votojnë Elton Banon, pasi nuk kanë asnjë të përbashkët me Lulzim Bashën.
“Ai rastisi arrë me vrimë, i prishur. Do bëni gjithçka që asnjë votë mos të shkojë për logon e rrëmbyer dhe Lul Bravën.”
Lideri historik i të djathtës u premtoi të rinjve përfaqësim në strukturat drejtuese të PD.
“Ne kemi nevojë për të rinjtë, askush nuk ka energjinë e të rinjve. Ky revolucion do të vendosë rininë shqiptare në piedestal.”
Gjatë paradites ish-kryeministri Berisha zhvilloi takime me strukturat e PD në Sukth e Shkallnur të Durrësit, ku “Shtëpia e Lirisë” garon me kandidat Ardian Mukën.