Kryeministrja e Serbisë, Ana Bërnabiç në një reagim për mediat është shprehur se raportuesja për Kosovën në Parlamentin Evropian, Viola von Cramon deklarohet për të gjitha temat që kanë të bëjnë me Serbinë “pa marrë parasysh sa të brendshme janë”.
Bërnabiç pyetjes për deklaratat e eurodeputetes rreth situatës në fabrikën kineze të gomave Linglong në Serbi, tha se ajo po trajtonte të gjitha temat në Serbi, duke lobuar për njohje të reja për pavarësinë e Kosovës.
“Duke respektuar luftën kundër shpalljes së pavarësisë së Kosovës, duke lobuar për njohje të reja të Kosovës dhe duke komentuar çështjen e punëtorëve vietnamez dhe kinez në Linglong. Pra, çdo gjë që mund të dëmtojë Serbinë, aty mund ta gjeni Viola von Cramon”, ka thënë ajo.
Ndër të tjera, kryeministrja serbe është shprehur se Von Cramon ndërhyri në punët e brendshme të Serbisë dhe mori pjesë në garën zgjedhore, në të cilën siç tha kryeministrja serbe ka të preferuarat.
Viola von Cramon tha një ditë më parë për mediat në Serbi se raportet shqetësuese mbi kushtet e rënda në të cilat vietnamezët jetonin dhe punonin në fabrikën kineze në Serbinë veriore ishin shqetësuese dhe duhet të hetohen.
