Detaje të reja janë publikuar përsa i përket zhdukjes misterioze të shefit të Antidrogës së Ulqinit, Rudolf Elezoviç. Këtë herë, mediat serbe shkruajnë se Elezoviç u arratis në Shqipëri me dokumente të rreme nga ku mund të jetë larguar drejt SHBA-së, pasi zbuloi se u pikas për lidhjet e tij me trafikantët e drogës.
Më tej, mediat serbe shkruajnë se Elezoviç nuk ka kaluar në asnjë nga pikat kufitare pasi dokumentet e tij të identifikimit u gjetën në banesë, duke çuar në mundësinë e arratisjes përmes rrugëve të paligjshme që përdoren zakonisht për kontrabandë.
Sipas “Dnevni novini” ai kishte kërkuar ndihmë nga anëtarët e organizatës kriminale në Shqipëri, të cilët i kanë siguruar dokumente të rreme për t’u arratisur.
Sipas informacionit jozyrtar nga policia, Elezoviç dyshohet se ishte përmendur nga të dyshuarit e arrestuar në operacionin “Kurthi” si një person i cili u dha atyre informacion në lidhje me lëvizjen e policisë.
