Autoritetet në Kosovë konfirmuan të premtën se gjatë 24 orëve të fundit, 26 persona kanë humbur jetën nga pasojat e COVID-19.
Po ashtu brenda 24 orëve janë konfirmuar 1 mijë e 448 raste të reja të të prekurve nga virusi.
Kosova po përballet me një situatë të rëndë shëndetësore pas përhapjes së variantit “Delta” të COVID-19. Vetëm brenda periudhës prej 21 gushtit deri më sot kanë humbur jetën 273 veta si pasojë e COVID-19, ndërsa janë shënuar edhe një numër i lartë i infektimeve.
Aktualisht në Kosovë janë më shumë se 26 mijë raste aktive, numër ky që sipas ekspertëve është shumë i lartë dhe pritet të ndikojë në rritjen e atyre që do të kërkojnë trajtim spitalor.
Autoritetet shëndetësore thanë të premtën se në spitalet dhe klinikat e Kosovës po trajtohen 1 mijë e 209 pacientë nga COVID-19, prej tyre 1 mijë e 19 me oksigjeno-terapi ndërsa 79 veta janë në gjendje të rëndë shëndetësore.
Për të parandaluar gjendjen aktuale me COVID-19, qeveria e Kosovës ka vendosur masa shtrënguese duke kufizuar lirinë e lëvizjes, shtyerjen e procesit mësimor dhe shkurtimin e orarit të punës për kafet dhe restorantet.
