Ministri i Drejtësisë, Ulsi Manja ka zhvilluar një vizitë në burgun e grave ditën e sotme. Në fjalën e tij, ministri Manja tha se po përpiqen që të krijojnë kushte dhe standarde më të mira për të gjitha gratë që po vuajnë dënimin. Ai gjithashtu bëri me dije se po diskutohet zhvendosja e këtij institucioni në Pogradec.
Manja: Të njëjtën urim u bëra grave dhe vajzave që po vuajnë dënimin përkohësisht në IEVP Ali Demi. Ua thashë edhe aty kam ardhur në këtë institucion kur u bëra ministër dhe u kisha premtuar do të bëjmë çmos për standarde për të mira jetese. Sepse vetë ligji u ofron atyre një trajtim të posaçëm kur vuajnë dënimin. Ky institucion nuk ofron kushtet më të mira. Kemi bisedime lidhur me të ardhmen e këtij institucioni.
Janë dënuar nga drejtësia për fajet që kanë bërë dhe, dëshirojnë të rikthehen pranë familjes. Pata një mundësi dhe e shfrytëzova t’i qartësoj për ligjin e amnistisë. Nuk dua të bie në kurthin e shifrave sepse mund të ndryshojnë në varësi të miratimit të ligjit në parlament. Një pjesë e grave e përfitojnë plotësisht. Ata që përfitojnë më shumë nga ulja në dënim. Deri në fund të vitit numri i grave që lirohen për shkak të uljes është më shumë se ato që përfitojnë plotësisht nga amnistia.
Ky institucion ofron kushte për trajtimin e grave jo në parametrat e duhura. Nuk janë kushtet e pabanueshme, as shumë të vështira. Janë kushte optimale por jo ato që duhen të jenë. Po shikohet mundësia e lëvizjes nga ky institucion. Është diskutuar zhvendosja në Pogradec. Atje është drejt përfundimit të mobilimit brenda marsit mbaron mobilimi i brendshëm. Plotëson të gjitha standardet e trajtimit të gjitha grave dhe vajzave të dënuara. Por do të bëhet pas amnistisë.
Manja, u shpreh se janë të gatshëm të tërhiqen nga amnistimi i të dënuarve nga Gjykata e Posaçme, ndërsa tha se drafti duhet të marrë të gjitha votat në Kuvend.
Në një prononcim për mediat, pas vizitës së të dënuarave në Burgun e Grave në Ali Dem, Manja tha se nëse ky amendament është problemi, do të tërhiqen.
Manja: U bëj thirrje të gjithë kolegëve të mi në Kuvendin e Shqipërisë, pa përjashtim… dhe një nga arsyet se unë pres ditën kur ta fusim në rendin e ditës, ka të bëjë me votën që duhet të marrë, jo thjesht 84 vota. Unë kam thënë se ky ligj amnistia, që ka 4 vjet që nuk është bërë të marrë votën e të gjithë deputetëve. E kam thënë që ditën e parë, nëse problemi është ai amendament, ne kemi deklaruar, jemi të gatshëm të tërhiqemi, sepse nuk ka qenë në versionin fillestar të amnistisë. Por nëse do të pyesni një zonjë brenda burgut, i cila është dënuar nga GJKKO dhe kur i thashë që ka një qëndrim për këtë, mendojeni dhe pozitën e asaj që priste të përfitonte 1 vit e gjysmë viti ulje dënimi, por fatkeqësisht dakordësia dhe kompromisi për ta kaluar atë ligj, është heqja dorë nga ai amendament. Ne jemi të gatshëm të tërhiqemi nga amendamenti./vizionplus.tv
