Policia e Tiranës ka arrestuar një 52-vjeçar, i cili prej më shumë se 6 vitesh mbante të ngujuar gruan dhe fëmijët e mitur nën kërcënimin e armëve.
Sipas policisë në pranga ka rënë Gjergj Laçi, i cili njihet për qëndrime e sjellje radikale. Për shkak të bindjeve fetare, ai prej 6 vitesh nuk lejonte fëmijët që të shkonin në shkollë, madje edhe i dhunonte ata si dhe bashkëshorten e tij duke mos i lënë që të dalin nga shtëpia.
Në banesën e tij policia i gjeti edhe municione luftarake.
Ndërkohë fqinjët pohuan se familja Laçi jetonte në kushte të vështira ekonomike.
Ka 20 vjet që i njoh. Nuk i njihja të gjithë. Ti shife vetë. Drita jo. Ujë jo. Të varfër. Ne kemi kaluar mirë, s’di të kenë probleme. Fatin e tij mos e pastë kush. Kur s’ke pune, s’ke lekë, ske të ardhura. Të prishet shtëpia. Çfarë do bësh?- shprehen fqinjët.
Gjergj Laçi është një emër i njohur për policinë. Para 9 vitesh ai u arrestua pasi terrorizoi zonën e 5-majit duke qëlluar me automatik.
