Me entuziazëm dhe brohoritma, kështu i mbyllën provimet e lirimit nxënësit e shkollës 9 vjeçare “Ahmet Gashi” në kryeqytet, pasi iu nënshtruan testit të gjuhës së huaj.
Ata shprehen të kënaqur dhe optimistë për rezultatet e tyre, pasi provimin e quajtën të thjeshtë dhe brenda programit mësimor që kanë ndjekur.
Nxënësit nënvizojnë se janë tërësisht gati për vazhdimin e shkollës së mesme.
Ashtu si në të gjitha provimet e tjera, edhe këtë herë teza u fotografua dhe doli në rrjete sociale vetëm pak minuta pas fillimit të provimit të gjuhës së huaj.
Aplikimi për regjistrim në klasën e dhjetë do të bëhet online përmes portalit e-Albania, duke dorëzuar dëftesën e lirimit te skanuar nga origjinali, kujdestarinë ligjore në rastet kur fëmija regjistrohet nga personi që e ka në kujdestari dhe një raport mjekësor kur aplikohet për shkollë të mesme me konkurs.
