Sot në mbrëmje përfundon afati për dorëzimin e kandidaturave për procesin e primareve, nga i cili do të dalin kandidatët për zgjedhjet lokale të 14 majit.
Ajo që bie në sy është se në bashkitë kryesore, Partia Demokratike ka futur në fushën e betejës figurat e saj kryesore politike.
Mësohet se për Bashkinë e Elbasanit, në procesin e primareve do të garojë nënkryetari i partisë, Luçiano Boçi. Ai është propozuar nga struktura dhe pritet të pranojë kandidimin.
Në Tiranë, tashmë kandidatët janë shpallur, dhe garuesit kryesorë janë anëtari i kryesisë Belind Këlliçi dhe mjeku Ilir Alimehmeti.
Në Durrës, në garë ka hyrë ish-deputeti Igli Cara.
Në bashkitë që tradicionalisht janë konsideruar si bastione të Partisë Demokratike, kandidaturat janë dorëzuar prej ditësh; në Shkodër do të garojë Bardh Spahija, i cili fitoi këtë bashki në zgjedhjet e pjesshme të 6 marsit; në Kukës Admir Sinamati, në Tropojë ish-kreu i bashkisë Besnik Dusha dhe ish-deputetja Mimoza Hadarmataj.
