Kryebashkiaku i pezulluar i Tiranës, Erion Veliaj, ka folur për herë të parë para trupës së Gjykatës Kushtetuese, ku po shqyrtohet ankimi i tij për shkarkimin nga detyra.
Veliaj tha se është “shkëputur pabesisht nga puna” dhe se ndaj tij është zhvilluar një “përpjekje për ta burgosur të vërtetën”.
Ai theksoi se largimi i një kryebashkiaku të zgjedhur nga populli, pa vendim përfundimtar të drejtësisë, përbën “përmbysje të demokracisë”, ndërsa kërkoi “jo mëshirë, por drejtësi kushtetuese”.
Veliaj: Më shkëputën pabesisht nga puna ata që donin të më shihnin me pranga në duar dhe jo me lopatë në duar. Mund ta burgosësh një njeri, por nuk e burgos dot të vërtetën që ulëret. Mosprezenca ime nuk ka qenë zgjedhje. Unë nuk zgjodha të internohem në një burg në kenetë. Nëse pranohet që një kryebashkiak i zgjedhur me votën e popullit mund të hiqet nga detyra pa vendim të formës së prerë, atëherë zgjedhjet e humbasin kuptimin, vota e humbet peshën. Kjo nuk është demokraci, është përmbysje e demokracisë. Aty ku pafajësia zëvendësohet nga paragjykimi, drejtësia pushon së ekzistuari. Nuk jam këtu të kërkoj mëshirë, por drejtësi kushtetuese./vizionplus.tv
