Kryetari i Bashkisë së Tiranës, Erion Veliaj ka reaguar një ditë pas protestës së Rithemelimit dhe Partisë së Lirisë, duke u shprehur se puna më e vështirë është ajo në shërbim të komunitetit.
Ndërsa inspektoi përfundimin e punimeve për asfaltimin e rrugës në fshatin “Gurrë të Vogël”, Veliaj nënvizoi se do të vijojnë investiemt në periferi.
“Për vitin tjetër sfida duhet të jetë që njerëzit të hapin sytë dhe të shohin kush punon dhe kush hedh bomba. Duhet me u thënë kush i bën punët, shkollat dhe rrugët. Për molotovët, jepja shishen edhe budallait më të madh dhe ai e hedh. Kurse për të bërë ndonjë punë, për të kapur lopatë, për të kapur kazmën, për të kapur rulin, eskavatorin, është një çikë më e vështirë.”
Veliaj shtoi se me asfaltimin e rrugës, rritet edhe vlera e pronës në këtë zonë, duke marrë shembullin e fshatrave Qeha dhe Tagan.
“E pashë edhe kur bëmë rrugën në Qeha: erdhën gjithë investitorët e Tiranës, duan me qenë afër rrugës, me ajër të pastër dhe pamje të jashtëzakonshme. Në këtë sens, edhe këtu do të vijnë investitorët, kjo është e pashmangshme. Ndodhi në Qeha, ndodhi në Tagan. Pra ku vjen rruga, vjen edhe zhvillimi.”
Projekti i përfunduar nga Bashkia e Tiranës përveç asfaltimit, ka bërë të mundur edhe rehabilitimin e akseve rrugore si dhe rikualifikimin urban të hapësirës së sheshit qëndror të fshatit./vizionplus.tv
