Sekretari i Përgjithshëm i Partisë Demokratike, Gazment Bardhi ka reaguar ndaj vendimit të kryetares së Kuvendit, Lindita Nikolla, për të rrethuar sallën e seancave plenare me forcat speciale të Gardës së Republikës. Bardhi e konsideron këtë vendim si shpallje zyrtare të shtetit autokrat të kryeministrit Rama, ndërsa përmes një fotoje ku dallohen punonjësit e Gardës në Kuvend, shton se po bëhen “prova” për të penguar demokratët gjatë aksionit të tyre opozitar.
“Sot jemi njohur me urdhrin e paligjshëm të Lindita Nikollës për të rrethuar të hënën sallën e seancave plenare me forcat speciale të Gardës së Republikës, duke shpallur kështu zyrtarisht shtetin personal autokrat të Edi Ramës. Siç shihet edhe në foton bashkëlidhur Garda e Republikës është urdhëruar të bëjë “provat” gjatë ditës së sotme sesi do të rrethojnë deputetët e opozitës gjatë seancës plenare të së hënës”, shkruan ai.
Bardhi shton se e dënon këtë vendim dhe nënvizon se ky është një akt i paprecedentë që e shndërron sallën e kuvendit në sallën e gardistëve qeveritarë dhe jo të qytetarëve.
“Duke dënuar me forcë këtë degradim të regjimit të Edi Ramës, duam të sigurojmë se nuk ka gardist e polic që mund të pengojë dhe intimidojë opozitën në misionin për të kthyer parlamentarizmin dhe për të mbrojtur të drejtat kushtetutese të opozitës. Një Parlament, ku deputetët rrethohen nga forcat e sigurisë gjatë vendimmarrjes së tyre, nuk mund të jetë kurrë Parlamenti i një vendi demokratik, anëtar i NATO-s dhe vend kandidat për në BE. Është akt i paprecedent në 32 vite demokraci, shndërrimi i sallës së Kuvendit nga salla e përfaqësuesve të qytetarëve, në sallën e gardistëve qeveritar. Ky Parlament është turpi i Shqipërisë, njëlloj si qeverisja e korruptuar e Edi Ramës”, shton ai.
Ky vendim vjen pas aksionit opozitar në Kuvend, ku përgjatë disa seancave plenare kanë bllokuar foltoren dhe ndezur tymuese.
