“Mosbindje civile, pa kthim. Deri në qeveri teknike.”
Opozita rikthehet në bulevardin “Dëshmorët e Kombit” sot në orën 18:00 për të nisur aksionin e mosbindjes civile për largimin e kryeministrit Edi Rama dhe krijimin e një qeverie teknike që do të çojë vendin në zgjedhjet e përgjithshme.
Gjatë paradites në selinë e Partisë Demokratike kanë qenë figurat kryesore të forcës më të madhe të opozitës për të mbyllur detajet e fundit të organizimit të protestës.
Sekretari i përgjithshëm Flamur Noka është takuar me kryetarin e Këshillit Kombëtar Edi Paloka si dhe me nënkryetarët e PD.
Ky është grupi i drejtuesve që pasdite do të nisen nga selia e PD drejt selisë së Kryeministrisë, ndërkohë që secili prej drejtuesve të qarqeve do të qëndrojë pranë protestuesve të zonës së tij.
PD është kujdesur të mos tregojë detaje për skenarin e protestës, por është bërë e qartë se fjalime politike nuk do të ketë dhe protestuesit do të mblidhen tek bulevardi “Dëshmorët e Kombit” për t’u shpërndarë e për të bllokuar disa prej rrugëve kryesore të kryeqytetit.
Nga ana tjetër është e sigurt se ky nuk do të jetë aksioni i vetëm i PD, pasi opozita ka paralajmëruar protesta të qëndrueshme deri në largimin e kryeministrit Edi Rama.
“O sot o kurrë. Është radha jonë.”/vizionplus.tv
