Shërbimi për Çështjet e Brendshme dhe Ankesat sqaroi mbremjen e sotme se institucioni ka qenë shënjestër e nje sulmi kibernetik që është parandaluar nga specialistët e IT.
Në njoftim theksohet se sinjali është kapur në kohë dhe sulmi është bllokuar për të mos lejuar asnjë rrjedhje të dhënash që ka të ruajtur institucioni.
Postimi:
Në përgjigje të interesit të medias, sqarojmë se specialistët pranë Sektorit të Teknologjisë dhe Informacionit (IT) në Drejtorinë e Përgjithshme të Shërbimit për Çështjet e Brendshme dhe Ankesat (SHÇBA) kanë arritur të parandalojnë një tentativë për sulm kibernetik në serverat qendror të institucionit. Nga ndërhyrja e shpejtë dhe në kohë është bërë i mundur bllokimi i këtij sulmi duke mos lejuar asnjë dëmtim apo rrjedhje informacioni të Shërbimit. Aktualisht, specialistët e IT po punojnë për rritjen e sigurisë së mëtejshme të të gjitha sistemeve dhe rrjetit të Shërbimit. Duke falënderuar për mirëkuptimin dhe besimin ndaj SHÇBA, lutemi që për çdo ankesë të telefononi në numrin e gjelbër (pa pagesë) 08009090.
