Deputetët e Partisë Demokratike kanë ripërsëritur kërkesën e tyre për ngritjen e një komisioni hetimor për Portin e Durrësit.
Ka qenë deputeti Oerd Bylykbashi ai që ka dorëzuar kërkesën në Kryesinë e Kuvendit.
Në një deklaratë për mediat, Bylykbashi e ka quajtur Portin e Durrësit një aferë korruptive.
“Kjo është afera më e madhe korruptive. Kjo aferë zhduk portin 2700-vjeçar. Nuk ka garanci për portin e ri. Janë 150 milionë euro që qeveria i fal investitorit. Është një deformim i konkurrencës. Miqve të Ramës u jepet fitim shumëfish”, është shprehur Bylykbashi.
Nga ana tjetër, deputetja Albana Vokshi i ka kërkuar kryetares së Kuvendit, Lindita Nikolla, që të vërë në lëvizje mekanizmat për ngritjen e këtij Komisioni Hetimor.
“Kërkoj që Lindita Nikolla të vërë mekanizmat për ngritjen e këtij Komisioni. Është detyrim Kushtetues”, është shprehur Vokshi për mediat.
Kërkesa që Oerd Bylykbashi dorëzoi në Kryesinë e Kuvendit është firmosur nga 35 deputetë opozitarë.
