Kryeministri Edi Rama ka ndarë lutjet e tij për shëndetit e themeluesit të Partisë Socialiste, Fatos Nano. Kryesocialisti Rama i referohet paraardhësit të tij si lider historik që ktheu padrejtësinë në guxim drejt lirisë për veten dhe vendin.
Rama shkruan se Nano së bashku me furinë e zemëratës mbarëpopullore i sollën vendin dritë duke e nxjerrë nga errësira e regjimit komunist.
Shkrimit të tij, Rama i ka bashkangjitur edhe Medaljen e Mirënjohjes Publike që i jepet Fatos Nanos.
“Në këto orë të vështira të luftës për jetën, lideri historik i Partisë Socialiste dhe njeriu që vuajtjen e padrejtë të heqjes së lirisë e ktheu në burimin e një fryme liberale në udhëheqje, në një kohë kur Shqipëria përballej me shëmtinë e egër të një konflikti politik të nxitur nga shpirti i hakmarrjes, padijes, errësirës dhe me egërsinë e pakufishme të një kapërcimi të madh historik, nga izolimi i tejskajshëm komunist drejt demokracisë si sprovë e tejmundimshme, në një tokë të djegur prej zjarrit e hekurit të perandorive e regjimeve që pasuan njëri-tjetrin qysh prej pavarësimit të Shqipërisë, ku nuk u rrit dot kurrë shtati institucional i shtetit e ku liria e ardhur me furinë e zemëratës popullore solli bashkë me dritën e së ardhmes edhe plagët e tmerrshme të shkatërrimit të shumëçkaje në emër të luftës për demokraci, meriton sot lutjet tona dhe mirënjohjen tonë për gjithçka të mirë mundi t‘i japë vendit dhe shoqërisë në rolet e rënda që pati gjatë karrierës së tij me të përpjeta e të tatëpjeta të mundimshme”,shkruan ai.
Advertisement
Themeluesi i forcës së majtë në vend dhe ish kryeministri, Fatos Nano po përballet me një periudhë të vështirë shëndetësore, për shkak të problemeve me mushkëritë.
