Banka kombëtare e Kroacisë njoftoi një konkurs të ri për modelin e monedhës një euroshe të vendit pas skandalit për plagjiaturë. Skandali shpërtheu për shkak të logos që përmbante një kunadhe që qëndronte në një degë, e që përngjante me një fotografi të shkrepur nga fotografi britanik, Iain Leach, duke nxitur akuza për plagjiaturë.
Pas gjithë zhurmës së madhe të krijuar në media dhe rrjetet sociale , fituesi tërhoqi dizajnin e tij. Disa orë më vonë, banka kombëtare kroate ka njoftuar për konkursin e ri. Vetë Leach përshëndeti vendimin e dizajnuesit për të tërhequr dizajnin. “Nuk e kam ndërmend të padis askënd. U mor një vendim i duhur dhe këtu mbyllet historia”, është shprehur ai për mediat kroate.
Modelet e tjera fituese përfshijnë monedhat me hartën e Kroacisë, shpikësin e njohur Nikola Tesla dhe alfabetin më të vjetër sllav. Nga 27 shtetet anëtare të BE-së, 19 prej tyre tani përdorin Euron si monedhën e tyre.
Sipas një studimi të vitit të kaluar 61% e kroatëve mbështesin kalimin në monedhën Euro, pavarësisht frikës se adoptimi i monedhës mund të çojë në inflacion. Kroacia do të adoptojë Euron si monedhën e saj kombëtare në vitin 2023.
