Ministrja për Marrëdhëniet me Parlamentin Elisa Spiropali ka mohuar që mes PS dhe Rithemelimit ka pasur negociata për reformën zgjedhore dhe ngritjen e komisioneve hetimore.
Në një postim në rrjetin social, Spiropali shkruan se PS nuk ka qenë pengesë për komisionet hetimore, teksa shton se edhe për “Zgjedhoren” opinioni i shumicës është shprehur me kohë.
“Partia Socialiste nuk ka çfarë negocion fshehurazi me opozitat kuvendore. Hamendjet mediatike lidhur me një negociatë sipas disave për të qetësuar harbimin e rrugicës së dëshpërimit apo sipas disa të tjerëve për të vrarë të vetëvrarin Lul janë pa asnjë bazë.
Konkretisht:
- Ne kurrë s’kemi penguar ngritjen e komisioneve hetimore, po bazuar në udhërrëfimet e Gjykatës Kushtetuese kemi refuzuar të votojmë për pseudo-komisione në shkelje të Kushtetutës. Çdo kërkesë për komision hetimor brenda kornizës kushtetuese është i mirëseardhur.
- Sa për Komisionin e Reformës Zgjedhore opinioni ynë është publik dhe është shprehur ka kohë edhe nga vetë kryeministri. Thelbi është i thjeshtë fare: Komision Bipartizan me shumë Partiskanë ku secili do të nxjerrë nga qeleshja e vet një reformë sipas oreksit të vet, nuk kemi se si gënjejmë veten se bëhet dot”, shkruan Spiropali.
Ministrja për Marrëdhëniet me Parlamentin më tej shton se PS nuk i vjen dot në ndihmë degradimit të opozitës.
“Kështu që edhe po të donim të negocionim gjësendi me rrugicën e dëshpërimit nuk do ta gjenim dot çfarë mund të ishte, ndërkohë që në Parlament ne shkojmë për të votuar ligje, ndërsa opozitat për t’i debatuar ato me ne. Kur opozitat s’duan të debatojnë po të harbojnë, ne votojmë dhe vazhdojmë punët e tjera. Kaq është e gjitha dhe megjithë keqardhjen e madhe për degradimin e opozitave, nuk kemi asnjë mundësi t’u vijmë në ndihmë as atyre që ulërijnë nga pagjumësia, as atyre që flasin në gjumë”, tha Spiropali.
Sot u raportua se kryeparlamentarja Lindita Nikolla kishte zhvilluar një takim me krerët e grupeve parlamentare, Gazment Bardhi dhe Blendi Çuçi, ku ishte arritur dakordësia për bashkëkryeatrin e reformës zgjedhore dhe ngritjen e komisioneve hetimore./vizionplus.tv
