
Prej vitesh, e sidomos në prag të festave, mijëra njerëz po terrorizohen nga agjencitë e fluturimeve me mesazhe dhe thirrje telefonike.
Agjenci me emra nga perandoria e fantazisë thërrasin e dërgojnë mesazhe me qëllim të shitjes së biletave. Ky terror është shkelje e ligjit për mbrojtjen e të dhënave personale, shkelje e privatësisë, keqpërdorim i numrave të telefonit.
Një koleg imi, fotograf i njohur, me të cilin para disa vitesh kam qenë në Kosovë, sapo më dërgoi një email me këtë përmbajtje: “Vazhdimisht po marrë thirrje nga numra të ndryshëm të telefonit mobil me oferta për fluturime.
Kur i thërras për t’iu thënë se duhet ta shlyejnë numrin tim, askush nuk flet gjermanisht apo anglisht.
A mund t’ju thuash të më lënë të qetë? Do të isha mirënjohës. Këto thirrje janë nervangacmuese dhe ata janë shumë të pasjellshëm kur ju telefonoj”.
Kush po ua jep (shet?) numrat tanë agjencive dubioze të udhëtimit?
A ka përgjigje Telekomi i Kosovës? A ka përgjigje ministria përkatëse? A ka përgjigje agjencia për mbrojtjen e të dhënave? A kanë përgjigje shoqatat për mbrojtjen e konsumatorëve?