Atentati mafioz mbrëmjen e të premtes që i mori jetën Klisman Preçit dhe plagosi rëndë Ylli Brahimin në Milot, po hetohet i lidhur me masakrën e Fushë Krujës pak ditë më parë.
Hetuesit kanë mbledhur prova që tregojnë se ekzekutimet kanë pika të përbashkëta në mënyrën e organizimit, armëve të përdorura, brutalitetit të sulmit, lidhjeve shoqërore të viktimave si dhe të kaluarës së tyre.
Të dhënat e deritanishme tregojnë se në krim morën pjesë tre persona: dy prej tyre të armatosur me kallashnikov dhe shoferi që i priste në makinë. Ata kishin zënë pritë përballë pallatit ky banonin Klisman Preci dhe Ylli Brahimi, fqinj me njëri tjetrin. Sapo ata kanë zbritur nga makina e blinduar tip “Fuoristradë”, agresorët qëlluan me rreth 100 plumba.
Pasi lanë të përgjakur të dy të rinjtë, autorët u larguan me automjetin e tyre tip “Audi”, të cilin e dogjën më pas në fshatin Gramë të Krujës. Brenda tij, policia gjeti të shkrumbuar edhe dy automatikët që dyshohet se u përdorën në vrasje.
Hetuesit po verifikojnë kamerat e sigurisë së bizneseve përreth vendit të ngjarjes, po ekzaminon telefonat e viktimave, si dhe po merr dëshmitë ë familjarëve dhe personave të tjerë që mund të kenë dijeni për ngjarjen. Ndërsa shënjestra kryesore e atentatit Ylli Brahimi, ndodhet në gjendje të rëndë në spital, por jashtë rrezikut për jetën.
Burime të policisë pohuan se po hetohet e kaluara e dy të rinjve, të cilët i kanë shpëtuar atentateve që u janë bërë më herët. Ngjarja besohet se lidhet me goditjen e një grupi të fuqishëm në zonë, nga një tjetër organizatë kriminale, me motiv hakmarrjen.
