Punonjësit e zjarrëfikëses kanë arritur të shpëtojnë një foshnjë 6 muajshe, e cila kishte mbetur e mbyllur brenda apartamentit në një pallat në zonën e “Freskut” në Tiranë.
Ngjarja është regjistruar mëngjesin e kësaj të hëne.
Sipas informacioneve, nënës i është mbyllur dera dhe ka ngelur jashtë, ndërsa fëmija ndodhej brenda ambienteve të apartamentit. Pasi nuk ka mundur ta hapë e vetme, nëna ka lajmëruar forcat zjarrfikëse të cilat kanë mbërritur menjëherë në vendin e ngjarjes.
Sikurse duket në videon e mëposhtme me ndërhyrjen e forcave zjarrfikëse foshnja është nxjerrë jashtë me shkallë.
Janë të shumta rastet kur forcat zjarrfikëse të Tiranës ndërhyjnë jo vetëm për shpëtimin e jetëve nga zjarret, por dhe nga aksidentet apo raste të tjera emergjente duke ndërhyrë në kohë rekord.
