Kampionati spanjoll është rikthyer edhe pse pandemia Covid 19 ka kufizuar pjesëmarrjen e tifozëve në stadium. Mbrëmjen e sotme Barcelona kishte përballjen e saj me Majorkën në fushën e kësaj të fundit, ku fitorja ishte detyrim.
Takimi nisi vrullshëm për lojtarët e Barcelonës, të cilët shënuan që në minutën e dytë të pjesë së parë, duke treguar supermaci. Në fushë ishte edhe Leonel Messi, që nuk ka shkëlqyer, por edhe ai e la gjurmën e tij në këtë takim me një gol në minutat e fundit të takimit.
Blaugranët e kishin ndeshjen thuajse nën kontroll përmes lojës, çka solli edhe golin e dytë në minutën e 37 të 45 minutave të para, duke shkuar në dhomat e zhveshjes me avantazhin e dy golave, për të hipotekuar fitoren.
Pjesa e dyta ishte më me ritëm për të dy ekipet, por sërish Barcelona kishte për të treguar në këtë sfidë. Në minutën e 80 mendoi Jordi Alba për të trefishuar rezultatin, që u duk se do të mbyllej me këto shifra, por Leonel Messi e ka lënë për në fund “vulën” e tij.
Ai shënoi golin e fundit të takimit dhe katërfishoi rezultatit, duke hipotekuar edhe tre pikat e para të ndeshjeve që kanë filluar të luhen pas gati më shumë se tre muaj.
