Pas shkarkimit të Ekipit Menaxhues për Asociacionin nga qeveria e Kosovës, Bashkimi Europian reagoi përmes zëdhënësit, duke e quajtur këtë vendim një shkelje të marrëveshjes.
“Sa i përket vendimit të raportuar të Kosovës për shpërbërjen e ekipit menaxhues, marrëveshjet e dialogut thonë qartë se ekipi menaxhues duhet të jetë në funksion deri sa të miratohet statuti i Bashkësisë për Komunat me shumicë Serbe.Kjo nuk është ende çështja. Drafti i parë i statutit u prezantua nga ekipi menaxhues më 2 maj në dialogun e nivelit të lartë, i cili tashmë nis procesin e negociatave. Prandaj, vendimi për shpërndarjen e ekipit menaxhues shkel letrën dhe frymën e marrëveshjeve të dialogut. Çdo vendim në lidhje me ekipin menaxhues duhet të miratohet në kuadrin e dialogut të lehtësuar nga BE-ja.”
Ndër të tjera, Zëdhënësi i BE-së theksoi se ndërmjetësuesit europianë, Josep Borrell dhe Miroslav Lajçak, do të ftojnë kryenegociatorët e Kosovës dhe Serbisë për të filluar negociatat për statutin dhe se Ekipi Menaxhues do të ftohet të marrë pjesë në proces, nëse është e nevojshme.
“Lehtësuesi i BE-së do të ftojë kryenegociatorët dhe ekspertët e tyre në Bruksel për të filluar negociatat për statutin. Ne presim që të dyja palët të angazhohen në proces në mënyrë konstruktive dhe me mirëbesim, të përfundojnë negociatat me shpejtësi”
Draft-Statuti i Asociacionit të Komunave me shumicë serbe në Kosovë është prezantuar të martën në Bruksel, në kuadër të dialogut Kosovë-Serbi të udhëhequr nga BE-ja. Megjithatë, kryeministri Albin Kurti ka thënë se ky draft është i papranueshëm, pasi bie ndesh me Kushtetutën e Kosovës.
