Kryeministri izraelit Benjamin Netanyahu ka bërë me dije se është caktuar data për një ofensivë tokësore në Rafah, edhe pse nuk tha se cila ishte kjo datë.
Ai e konsideroi sulmin në Rafah të nevojshëm për një fitore të plotë ndaj Hamasit.
Rafah, në pjesën më jugore të enklavës së rrethuar, është vendi ku rreth 1.5 milionë palestinezë mendohet të jenë strehuar pasi kanë ikur nga lufta në veri.
Më herët të hënën, ministri izraelit i Sigurisë Kombëtare Itamar Ben Gvir tha se nëse Netanyahu nuk zbaton planet për një ofensivë tokësore në Rafah, ai mund të humbasë mbështetjen e koalicionit që e ka mbajtur atë në pushtet.
Departamenti i Shtetit më vonë tha se Izraeli nuk i kishte informuar SHBA-të për datën që ka vendosur për pushtimin e Rafah.
Matthew Miller, zëdhënës i Departamentit të Shtetit, përsëriti se SHBA beson se një ofensivë tokësore do të kishte një efekt jashtëzakonisht të dëmshëm mbi civilët dhe se përfundimisht do të dëmtonte sigurinë e Izraelit.
“Ne nuk i kemi parë ende ata të paraqesin një plan të besueshëm për t’u marrë me 1.4 milionë civilë që janë në Rafah, disa prej të cilëve kanë lëvizur më shumë se një herë dhe të tjerë që kanë lëvizur më shumë se dy herë”, tha Miller në një konferencë për shtyp.
Miller tha se Shtetet e Bashkuara do të kenë biseda të mëtejshme gjatë ditëve në vijim me zyrtarët izraelitë rreth një operacioni të mundshëm Rafah dhe se si mund të zbatohet në mënyrën më të mirë. /vizionplus.tv
