Deklaratat e presidentit rus Vladimir Putin se avionët luftarakë F-16 janë objektiva legjitime për Moskën, madje edhe në fushat ajrore të vendeve të treta, janë një përshkallëzim i retorikës ruse që mund të çojë potencialisht në një luftë, sipas nënkolonelit suedez Joakim Paasikivi.
“Sigurisht, nëse ato përdoren nga fushat ajrore të vendeve të treta, ato bëhen një objektiv legjitim për ne, kudo që janë,” ka thënë Putin, raportoi agjencia e lajmeve TASS, duke shtuar se meqenëse avionët luftarakë të prodhuar nga SHBA mund të mbajnë armë bërthamore, Rusia duhet ta “marrë parasysh këtë”.
Për nënkolonelin suedez Joakim Paasikivi të Universitetit të Mbrojtjes së Stokholmit, deklarata e Putinit është kryesisht një përshkallëzim retorik, por kërcënimi duhet marrë shumë seriozisht.
“Nëse Putini dëshiron një luftë me NATO-n, kështu e fillon atë. Atëherë do të jetë një luftë e tretë botërore”, tha Paasikivi për agjencinë suedeze të shtypit TT.
Sipas tij, fakti që F-16 mund të pajiset me armë bërthamore përshtatet mirë me narrativën ruse, e cila sillet rreth imazhit të Perëndimit si agresori i madh.
“Për Putinin, është e rëndësishme që vazhdimisht ta paraqesë Perëndimin si kërcënimin kryesor për audiencën e brendshme. I ashtuquajturi kërcënim bërthamor i Perëndimit është në qendër të të gjithë narrativës ruse”, tha Paasikivi.
Sipas nënkolonelit suedez, Putin është i shqetësuar se F-16, të cilët pritet të mbërrijnë në Ukrainë deri në verë, do të rrisin ndjeshëm aftësinë luftarake të Ukrainës.
“Kremlini po tregohet pak më i fuqishëm. Të njëjtat kërcënime janë bërë në të kaluarën, por identifikimi kaq i qartë i F-16-ve dhe objektivave të goditjes në Perëndim është diçka e re”, tha ai, duke shtuar se rusët ndihen të detyruar të përpiqen të trembin Perëndimin”.
Sipas Paaskivit, Rusia e di se nuk mund të fitojë një luftë kundër NATO-s, por nuk ka garanci.
“Rusia ka filluar luftën më të madhe në Evropë që nga Lufta e Dytë Botërore dhe po e bën atë pa mëshirë, pa ndjekur ligjet e luftës. Ne nuk mund t’i besojmë Rusisë, “tha ai.
Danimarka, Holanda, Norvegjia dhe Belgjika janë zotuar të dorëzojnë 45 avionë F-16 në Ukrainë.
Aleatët perëndimorë aktualisht po trajnojnë pilotët ukrainas për të drejtuar aeroplanët, me grupet e para që kanë përfunduar trajnimin e tyre në fillim të këtij muaji./vizionplus.tv
