Qeveritë e SHBA-së, Britanisë dhe Zelandës së Re kanë akuzuar Kinën se qëndron pas disa sulmeve kibernetike kundër institucioneve të tyre politike, duke shkaktuar një përgjigje të fortë nga Pekini.
Të tre qeveritë, në një lëvizje të rrallë, fajësuan publikisht Kinën për një seri sulmesh kibernetike në vitet e fundit, një veprim që dukej se synonte të kërkonte llogari nga Pekini.
Departamenti Amerikan i Drejtësisë ka njoftuar se ka paditur shtatë kinezë në lidhje me një fushatë të gjerë sulmesh kibernetike që zgjati 14 vjet. Ai shtoi gjithashtu se një shpërblim deri në 10 milionë dollarë do t’i ofrohet kujtdo që ka informacion për shtatë burrat.
Sipas Zëvendës Prokurores së Përgjithshme të SHBA, Lisa Monaco, këta hakerë synonin biznese, gazetarë në SHBA dhe jashtë saj, kandidatë për zgjedhje dhe politikanë. Shtatë hakerat kinezë dyshohet se dërguan më shumë se 10,000 emaile me qëllim të keq, duke prekur mijëra viktima në kontinente të shumta në një operacion që Departamenti i Drejtësisë i SHBA tha se ishte i mbështetur nga qeveria kineze.
Më herët zëvendëskryeministri britanik Oliver Dowden njoftoi në parlament se aktorët e lidhur me shtetin kinez kishin kryer dy sulme kibernetike keqdashëse në 2020 dhe 2021. Dowden foli për sulme kibernetike kundër deputetëve kritikë ndaj Pekinit dhe kundër Shteteve të Bashkuara.
“Ky është episodi i fundit në një seri aktivitetesh armiqësore nga Kina, të cilat përfshijnë shënjestrimin e institucioneve demokratike dhe parlamentarëve në Britani dhe vende të tjera”, tha Dowden. /vizionplus.tv
