Shefi i OKB-së për të drejtat e njeriut e përkufizoi si të tmerrshme situatën që palestinezët po kalojnë në Gaza. Volker Turk po fliste në Gjenevë, ku u tha gazetarëve se në konfliktin në Gaza ekzistonte një rrezik i shtuar i krimeve mizore.
Ai paralajmëroi se të tilla krime çnjerëzore, deklarata që nxisin mizori dhe akuzat për përdhunim do të hetohen dhe do të marrin përgjigje nga një gjykate kompetente.
Ai zbuloi se i kishte shkruar qeverisë izraelite në javën e dytë të tetorit, duke i ofruar për të vendosur një ekip vëzhguesish të të drejtave të njeriut të OKB-së për të hetuar sulmet ndaj Izraelit. Ai tha se ende nuk ka marrë një përgjigje, por shpreson për një të tillë.
Izraeli tradicionalisht ka refuzuar të bashkëpunojë me hetuesit e OKB-së për të drejtat e njeriut, duke pretenduar se ata janë të njëanshëm.
Marrëdhëniet e Izraelit me organizatat ndërkombëtare si OKB dhe KNKK janë përkeqësuar kohët e fundit, mes pretendimeve të Izraelit se po neglizhojnë vuajtjet e izraelitëve në sulmin e Hamasit.
Këtë javë Izraeli tha se nuk do të rinovonte vizën e koordinatores humanitare rezidente të OKB-së në territoret e pushtuara palestineze, sepse kishte humbur besimin tek ajo.
