Të paktën dy persona janë vrarë dhe dy të tjerë janë plagosur nga sulmet raketore ruse në Kiev mëngjesin e së mërkurës, njoftoi kryetari i qytetit ukrainas, Vitali Klitschko, në Telegram.
Trupat e dy personave u gjetën në një ndërtesë të pabanuar, ndërsa një person tjetër u lëndua nga copëzat e xhamave të thyer si pasojë e shpërthimit, tha Klitschko.
“Kievi nuk është përballur me sulm kaq të fuqishëm që nga pranvera. Armiku e ka kryer një sulm të kombinuar, duke përdorur dronë dhe raketa”, tha Serhi Popko, shefi i administratës ushtarake të kryeqytetit, shkruan REL.
Ai tha se, fillimisht, disa grupe të dronëve ishin nisur drejt Kievit nga lokacione të ndryshme.
Pas tyre, Rusia goditi me raketa nga avionët strategjikë Tu-95.
“Në përgjithësi, forcat e mbrojtjes ajrore i shkatërruan më shumë se 20 caqe të armikut”, nënvizoi Popko.
Autoritetet në Kiev kanë thënë se disa ndërtesa dhe disa shtëpi janë dëmtuan nga sulmet me dronë dhe raketa natën e 29 gushtit.
